Ilinniartitseqqittoqarnissaanut tunuliaqutit

Ilinniartiteqqinnermut peqataasut ilinniartitsinerni nalinginnaasuni, immikkullu sammisaqartitsinerni nutaaliorluni aallarnisaanerup atuartitsinerup iluani qanoq atorneqarsinnaaneranik ilinniartinneqartarput. Taassumalu saniatigut peqataasimasut atuartuutitik peqatigalugit unammisitsinernut, ”Projekt Edison”-imut ”Company Programme”-mullu, peqataasinnaanngortarput.

 

Siullermik ilinniartitseqqittoqarpoq 2017-imi maajimi aggustimilu. Tassani peqataasut 30-it sinnersimavaat, taakkunanilu amerlanerpaat ilinniartitsisuusimallutik. Peqataasut siullerpaallutik Kalaallit Nunaanni nutaaliorluni aallarnisaaneq pillugu ilinniartitsisinnaanermut allagartartaartuupput, maassakkullu ilisimasatik nutaat atorlugit atuartitsinernimmi nutaaliorluni aallarnisaaneq atulerlugu.

 

Ilinniartitseqqinneq suliniutaavoq nutaaq piviusunngortinneqarsimasoq Naalakkersuisut Fonden for Entreprenørskabilu suleqatigiinnerisigut, siunertaavorlu nutaaliorluni aallarnisaaneq, pilersitsisinnaanerlu Kalaallit Nunaanni meeqqani inuusuttunilu ilisimaneqarnerulernissaa. Kalaallit Nunaannilu ilinniartitseqqinnerup siunertarivaa nutaaliorluni aallarnisaanerup ilinniarfeqarfinni siuarsarneqarnissaa. 

 

Nutaaliorluni aallarnisaaneq pillugu ilinniartitsinermi inuusuttut nutaaliornermik eqqarsarsinnaassutsip isumassarsiallu piviusunngortinneqarsinnaanerannut iliuuseqarsinnaassutsip siuarsarneqarnera. Misissuinerit takutippaat inuusuttut nutaaliorluni aallarnisaanermik ilinniartinneqartartut pilersitsinissaminnik soqutiginnilertartut atuarnertillu nuannarinerulertaraat.

 

2021-ip naanerani imaluunniit 2022-ip aallartinnerani nutaanik ilinniartiteqqittoqassaaq. Tamanna pillugu nittartakkakkut maana paasissutisseeqqissaagut.